Tinhlobo Tetindzaba
- Indzaba Lelandzisako
- Indzaba Lechazako
- Indzaba Leveta Limuva Lembhali
- Indzaba Lenhlangotsimbili Leveta Simo Njengobe Sinjalo
- Indzaba Lehlangotsilunye
Indzaba Lelandzisako
Umfundzi akakwati kuticambela indzaba, ayibhale alandzele timiso netakhiwo, abe nelikhono lekubumba intfo lengekho ibe khona. Kufanele akhetse kahle emagama ahambisane nembhalo, irejista, atati futsi atibone tinhlobo tetindzaba. Kubalulekile kutsi umfundzi avisise sihloko sendzaba avisise nekutsi siluhlobo luni, bese wakha luhlaka latawubhala asusela kulo.
Umfundzi akasebentise lulwimi lolufanele (irejista) aphindze alunonge ngetinongo tenkhulumo, asebentise taga netisho ngendlela lefanele lekhombisa lwati, afake netiga tenkhulumo imbala. Umfundzi akayiphotse kwentsambo indzaba yakhe, tindzima titselelane emanti, kusukela esingenisweni kuyewufika esiphetfweni.
Indzaba lelandzisako nguleyo lecoca indzaba nobe lelandzisa ngesigameko lesitsite lesake senteka esikhatsini lesengca. Ingabhalwa isuselwe kunobe nguluphi luhlangotsi.
Timphawu Tendzaba Lelandzisako
Cikelela loku lokulandzelako uma ubhala indzaba lelandzisako:
- Indzaba kumele ibe netigameko letitayenta ibe yindzaba lekholwekako nanobe isuselwa enhloko.
- Indzaba lelandzisako ivame kubhalwa ngesikhatsi lesengcile.
- Indzima yesingeniso kumele ihehe tetsamelilwati.
- Indzaba lelandzisako kuyenteka ifake tincenye letichazako.
- Siphetfo lesiyingwijikhwebu lejabulisako sinika lisasasa endzabeni.
- Umfundzi wendzaba kumele aheheke kute kube sekugcineni kwayo. Indlela, emasu ebugagu nemnyakato kufanele kucinisekise kuyijabulela.
- Kulandza lokuyimphumelelo kukhomba ngalokusobala imininingwane yemiva njengekubona, umsindvo, kunambitseka, liphunga nekutsintsa.
- Khumbula kutsi indzaba lelandzako ineluphawu lolucinile lwekuchaza.
Imisebenti Yendzaba Lelandzisako: Tivivinyo
Bhala indzaba ngasinye saletihloko letilandzelako ibe ngemagama lasukela kula-340 aye kula-390.
- Kwatsi kusenjalo kwana imvula lenkhulu!
- Ngeva sengatsi ngiyaphupha…
- Sengatsi kungaphindze kwenteke loku.
Indzaba Lechazako
Endzabeni lechazako, lobhalako uchaza bantfu, simo lesitsite, tindzawo, imphilo, tihlahla, sehlakalo lesitsite, njll. Intfo lechazwako kufanele tetsamelilwati tiyibone ngemehlo engcondvo nobe titakhele sitfombe sayo engcondvweni ngemagama lasetjentisiwe nakuchazwa.
Loluhlobo lwendzaba lwehluke kuletinye ngekutsi umbhali angasebentisa tinhlobo letibanti letehlukene tetichasiso, letifaka ekhatsi tiphawulo, tibaluli, tandziso, tentakutsi, njll. Umbhali angabuye asebentise tinhlobo letibanti letehlukene tetinongo tenkhulumo, taga, tisho, tiga tenkhulumo, njll.
Timphawu Tendzaba Lechazako
Cikelela loku lokulandzelako uma ubhala indzaba lechazako:
- Chaza umuntfu/intfo ngendlela letawuvusa imiva yekubona, yekuva, yekutsintsa neyekunuka kube ngatsi tetsamelilwati sikubona ngalokucacile lokukhulunywa ngako.
- Yakha sitfombe ngemagama.
- Khetsa emagama netinkhulumo ngekucophelela kufinyelela kuloko lokuhlosiwe.
- Sebentisa imifanekiso lebonwako, yemsindvo, yekuva, yekunambitsa nekutsintsa.
- Sebentisa tinongo tenkhulumo.
Indzaba Leveta Limuva Lembali
Indzaba leveta limuva lembhali iveta imibono, tiphakamiso, imicabango nemiva yembhali ngesihloko lesitsite, kakhulukati loku lasuke anenshisekelo ngako. Kuvamise kutsi icondzane nembhali kunekutsi icondzane nanobe ngubani, idzinga sakhiwo lesihlelekile kodvwa hhayi siphetfo lesicacile.
Timphawu Tendzaba Leveta Limuva Lembali
Cikelela loku lokulandzelako uma ubhala indzaba leveta limuva lembhali:
- Indzaba leveta limuva lembhali icuketse luvo lwembhali lolucondzane naye ngco kunekutsi icondzane nalabanye.
- Imiva nendlela umbhali latsatsa ngayo tintfo ibaluleke kakhulu kuloluhlobo lwendzaba.
- Incenye lenkhulu yalendzaba iyachaza. Letinchazelo kumele ticace tibe nenhloso yekubuye takhe kabusha tinkhumbulo letisengcondvweni nobe imiva yembhali endzabeni.
- Imibono, imicabango, nobe imiva letfuliwe fanele ivete kwetsembeka nekutibandzakanya kwembhali.
Indzaba Lenhlangotsimbili
Tindzaba letinhlangotsimbili atitsatsi hlangotsi futsi tihlose kuveta imibono yetinhlangotsi totimbili tetiphakamiso ngalokulinganako.
Timphawu Tendzaba Lenhlangotsimbili
Cikelela loku lokulandzelako nangabe ubhala indzaba lengunhlangotsimbili:
- Kufanele uvisise sihloko ubuye ukwati kuveta totimbili tinhlangotsi tembono.
- Umbhalo wakho kufanele ucace, uvakakale ungatsatsi luhlangotsi.
- Kufanele wetfulwe titatimende letizotsile, leticatjangisisiwe naletesekelwe kahle.
Indzaba Lehlangotsilunye
Tindzaba letihlangotsilunye tesekela nobe tiphikise umbono lotsite. Endzabeni lehlangotsilunye, umbhali unembono nobe siphakamiso lesitsite lasiveta, asesekele abuye anike bufakazi baso kute tetsamelilwati titsatse nobe tivumele umbono wakhe.
Timphawu Tendzaba Lehlangotsilunye
Cikelela loku lokulandzelako uma ubhala indzaba lehlangotsilunye:
- Khetsa luhlangotsi lunye ungagudluki kulo endzabeni yonkhe.
- Nika tinhlobo letibanti letehlukene tetiphakamiso kwesekela nekucacisa umbono wakho.
- Sebentisa tinongo letehlukene tenkhulumo.
- Phetsa ngesitatimende lesinemandla, lesicacile nalesikholwekako.